Woh din khuda khuda kar kay aa gaya jab Kulthum aur may hamesha kay liye ikathay honay jaa rahay thay.. April 2005. Sach baat to yeh kay may us ko Indonesia say khud jaa kar laana chahta tha per itna sab kuch ek saath afford nahi kar sakta tha. Is liye Kulthum ko mainay ticket kay paisay bhaijay taakay woh wahan say hi ticket lay sakay. Kulthum kay Abu, Ammi aur behnon say phone per baat bhi ki aur un say muafi mangi kay may khud nahi aa saka. Mera khayal hay un ko samajh thi kay itna kharcha meray bass ki baat nahi hay.
Kulthum Indonesia say pehlay Narita, Japan jayegi, phir Vancouver, Canada, phir Toronto aur phir Halifax. Bahut ki lamba aur thaka denay wala safar ho ga aur woh zindagi may pehli baar khud travelling kar rahi thi. Mujhay ehsaas to tha kay yeh kaam us kay liye asaan nahi ho ga lekin aur choice kia thi hamaray paas. Halifax meray shehr say taqreeban 4 ghantay kay faslay per tha. Hamaray shehr say ek bus seedhi Halifax airport chalti thi. May nay isi may aafiyat jaani kay us bus per chala jaon aur hum dono usi per wapas aa jayengay. So may nay aisay hi kiya. Bus per Halifax kay airport pohuncha. Mushkil say adha ghanta hua ho ga kay us ki flight aa gayee. Ab mera dil zor zor say dharak raha tha. 3 saal baad kulthum ko phir apnay saamnay dekhoon ga. Samajh nahi aa raha tha kay pehlay alfaz kia kahoonga.. Bahut saaray khayalaat dimagh may ghoray ki tarah dor rahay thay. Jo safar 1998 may shroo hua tha ab 7 saal baad apni manzil kay qareeb ponchta dikhai day raha tha. May nay khud say kaha bas kuch aur lamhay, phir yeh doori khatam. Sab kuch thamnay wala tha. Bus ab zindagi may woh iztraab khatm ho jayega. Woh jo doori hum roz mehsoos kartay thay bus ab khatam honay wali thi. Phir Kulthum nazar aai. Jaisay waqt phir tham gaya ho.. Mujhay door say hi us kay aankhon may aansoo nazar aa rahay thay. Us ki nazar mujh per pari to bhaag kar lipat gayee. Ab waqi dooriyan khatm ho chuki theen. Kafi dair hum ek doosray ko galay laga kar rakha.. Sab kuch zehn may ghoom raha tha.. Pehli mulaqaat say lay kar woh sab museebatain jo is milan kay liye jheelein theen. Ab us kay ronay ki awaz barh rahi thi. Mere aankhon may bhi nami thi per dil ko ek sukoon tha.
Airport say hum usi bus may baithay aur wapas Fredericton kay liye nikal paray. Raastay may Kulthum ki baatein nahi khatam hoti theen. Boltay boltay nahi thakti thi. Kai dafa to mujhay yeh bhi ahsaas nahi hota tha kay woh keh kia rahi hay.. Bus us ki taraf takta jaata tha. Phir woh kehti thi.. You understand? Are you listening? Aur may keh deta tha haan haan sun raha hoon.
Ghar ponchay to woh bahut thak chuki thi per chup honay ka naam nahi leti thi. Saaray ghar ka muaina kia phir plan bananay lag pari kay kia kia chahye ghar kay liya. Mainay kaha abhi to jao nahao fresh ho jao.. Yeh kaam baad may kar lena. Woh fresh honay gaee to may nay Abu ko phone kia kay kulthum pohunch gaee hay. Abu nay bhi dhair saari duain deen. Us kay baad to har din eid tha har raat shab baraat. Itni baatain shayad mainay apni zindagi may nahi kee hongi. Un sab baaton may us kay mood kay saat rang they… hansti thi , qahqa lagati thi.. Phir preshan, phir udas, phir rona.. Yani sab kuch hi chal raha tha… aur may sukoon say us ko dekhay jaata. Dil aisi udari maar raha tha kay shayad ab meray liye yeh jahan fatah karna na-mumkin na tha. Har cheez may confidence feel hota tha. Kulthum bahut khayal rakhti thi… safai karna, khana banana, meray kapray dhona, istri karna… jootay tak theek kar deti thi… mujhay aisi royal treatment to bachpan may ammi say hi milti thi.. Us kay baad in sab ka to may aadi bhi nahi raha tha. May ab bhi Khaled ki company may hi kaam kar raha tha. Hum ab ek 2 bedroom kay apartment may move ho chukay thay.. Bari jaga thi, roshan kamray thay aur Kulthum ko to bus ghar arrange karnay ka junoon tha.
Jab woh canada aai to us nay mujh say ek din poocha kay kia may niqab kar sakti hoon. May nay kaha yeh mazaq nahi hay. Agar tum nay is ki niyyat ki hay to yeh one way road hay… har waqt karna ho ga, yeh nahi kay ek din kia aur doosray din utaar diya… niqab ki behurmati nahi karni. Us nay kaha kay us nay irada kar liya hay. Meray liye to yeh pride ki baat thi kay us kay dil may yeh khayal khud say aaya.
Wahan ek indian aunty thi.. Hindu thi.. Us ka samosay ka business tha. Kuch musalman log bhi waha kaam kartay thay. Kisi nay mujhay us ka bataya to mainay Kulthum say poocha kay woh waha kaam karegi… saara din ghar per baithay baithay bore ho jaati hay. Pehlay Kulthum thori hichkichai per phir razi ho gaee. Us job say hamain ek aur income mil gaee jo bari help thi. Aahista aahista lifestyle barhta gaya. Jo pehlay hum sasti cheezain letay thay ab mehngi cheezain aanay lag pareen. Meri apni adat to yeh hay kay paisay bacha bacha kar kharch karta hoon per kulthum ko kaisay mana karta.. Karta to tha per kabhi kabhar woh na sunti thi aur kharcha kar daalti thi. Us ka nateeja yeh nikla kay maheenay kay aakhir may ab paisay bamushkil pooray hotay. Mujhay bahut uljhan hoti aur may us say keh deta.. Aglay maheenay khayal karo… bacha bacha kar istimal karo… lekin phir wohi haal hota. Mujhay is cheez say stress ho jata per may is ka izhaar to nahi kar sakta tha. Bus chup kar jaata yeh soch kar kay Allah aur dayga… paisay bhi aur un ko bachanay ki taufeeq bhi. Kai dafa kulthum say choti moti nok jhonk ho jaati thi...us ki buri aadat thi woh ghussay may ho to bolti jaati thi...mujhay yeh bilkul pasand nahi tha..kai dafa boht bardasht karta per us kay constant bolnay per mujh say ghussa control nahi hota tha aur may na chahtay huay bhi oonchi awaz may us ko chup honay ka kehta. Lekin phir mera ghussa thanda bhi bahut jaldi ho jaata tha. Us ko mana bhi leta tha. Per woh bahut mushkil maanti thi. Ziddi thi.. Is liye bahut dair lagti thi us ko normal honay may.
Ek din kulthum kehnay lagi kay sir may dard hay. May nay kaha kia hua hay. Kehti hay Indonesia may bhi ho jata tha kabhi kabhi migraine ka dard. May nay kaha kabhi doctor ko nahi dikhaya… kaha dikhaya tha per kuch diagnose nahi hua. May us ko walkin clinic lay gaya. Doctor nay check kia to us nay poocha kay tumhara family doctor kon hay. Hum nay kaha abhi assign nahi hua. Khair us nay family doctor ki information li aur hamain kaha kay us say mil lo. Saath us nay hospital bhi refer kia keh blood aur urine test karwa lo.
Family doctor kay office call ki to unhon nay haftay baad ki appointment di. May kulthum ko us kay clinic muqarrara din lay gaya. Woh family doctor india say thi, aged thi per achay manners ki thi. Us nay miltay hi poocha kay pakistan say ho. May nay kaha ji.. To kulthum say urdu bolnay lag pari…. May nay kaha kay yeh indonesia say hay, urdu nahin bolti.. Bahut surprised hui. Sawal kia… kitna arsa hua hay shadi ko. May nay kaha shadi to 2002 may hui this lekin ab is ko yahan aai taqreeban ek saal honay wala hay. Phir us ko bataya kay Aunty geeta kay paas kaam bhi karti hay to doctor forun boli Geeta to meri dost hay. Phir poocha, kia family bananay ka irada nahi hay.. saath saath for kulthum kay blood reports aur urine reportd bhi dekh rahi thi. Mainay kaha irada to hay par jab tak Allah nahi day ga hum kia kar saktay hain. Kehnay lagi.. Mubarak ho Allah nay sun li hay….Kulthum pregnant hay.
Meray to pairon talay zameen nikal gaee… aankhon may ansoo.. Kulthum bhi rohansi si hui ja rahi thi…. Dil kar raha tha pahar per char jaaon aur zor say saari duniya ko bataon… may baap bannay wala hoon. Shadi kay baad woh doosra bara khushi ka din tha.Ghar ponchtay hi abu ko bataya.. Kulthum nay apnay ghar bataya. Lekin mujhay yaqeen nahi ho raha tha kay hum do say teen honay ja rahay hain. Dimagh may bahut say plan ban rahay thay… lekin har dam yahi dua nikalti thi sab khairiat say ho jai. Kulthum har dam ghar ko tayyar karnay may masroof thi naye mehmaan kay liye… us kay kapray, us ka crib, har cheez ready kar kay rakhna chahti thi. Roz hamara naamon per jhagra hota tha…Kehti thi larka hua to naam tum rakh lena.. Larki hui to may us ka naam Khadeeja-tus-Sughra rakhoongi. May bazid tha kay larka hua to Saifullah aur larki hui to Haleema. Akhir kaar ko woh din aa gaya jab hamaray is naye mehmaan nay is dunya may aana tha. Kulthum ko hospital lay kar gaya. Ab yahan hamaray ghar walay to thay nahi help karnay kay liye to may hi tha us kay saath. Doctor nay mujhay kaha kay kulthum ki pehli delivery hay to bahut ziada time lagay ga contractions may. Mujhay kaha kay tum us kay saath hi baitho taakay koi to us ki himmat bandhai. May delivery room may us kay saath tha.. Us ki labour taqreeban 18 ghantay ki thi. Main itna thak gaya tha… us bechari ki to haalat bahut hi kharab thi.. Finally raat kay pichlay pehr, delivery ho gaee aur hamari nanhi si pari is dunya may aa gaee. Jab woh paida hui to doctor us ko Kulthum kay paas lay gaee, kulthum nay us ko piyar kia, jism kay saath chimta liya. May nay Kulthum ki taraf dekha to shayad woh samajh gayee. Kehnay lagi.. Is ka naam Haleema rakh lo. Main bahut khush tha… us waqt to woh khadeeja bhi kehti to mujhay koi aiteraz na hota. Phir nurse nay haleema ko saaf kia aur meray paas lay aai. Mainay us kay kaan may azaan di aur tehneeq ki. Phir unhon nay haleema ko incubator may rakh diya. Woh thori under weight thi to doctors nay kaha kay us ko under observation rakhna ho ga. May kulthum kay paas ja kar baith gaya. Us ka haath meray haath may tha jo abhi bhi kaamp raha tha. Mujhay quran ki woh aayat yaad aa rahi thi..
Wa Hamalathu Wahn Ala Wahn… Kay Maan apnay bachay ko pait may rakhti hay kamzori per kamzori kay bawajood….
Kulthum bahut thak chuki thi… may nay socha usay araam karnay doon aur may jaa kar shukr ki namaaz parh loon. Haleema ka woh pehli baar meri taraf aankhay matka kar dekhna.. Chotay chotay haath.. Aur jab khujoor say us ki tehneeq ki to jis tarah say woh muskarai.. Woh manzar aaj bhi nazron kay saamnay taza hay..Mujhay us nanhi si pari nay ek nai pehchan day di thi...abuhaleema.
